DINOSAURIOEN ARRAUTZAK

Kaixo familiak!!

Zer moduz? Azken aste hauetan dinosaurioen proiektua lantzen ari gara eta, ikusi duzuenez, gelan arrautzak egin ditugu haurrek planteatutako galdera bat erantzuteko:

Nola jaiotzen dira dinosaurioak??

  Hori dela eta, gelan dinosaurioen arrautzak egitea erabaki dugu: 

Etxean animatu eta hurrengo pausuak jarraitu:

ARRAUTZATIK OILORA III

Kolesterolik gabeko arrautza berdeak.

Pasatu dira egun batzuk inkubadorarekin bigarren saiakera abian jarri genuenetik. Badakizue lehen saiakeran ez genuela txitarik izan eskolan, baina saiatuz egiten denez bidea hortan dihardugu. Ikasteko bide horretan urratsak emanaz goaz egun hauetan ere. Alde batetik, hegaztien inguruko gauzak ikasten eta bestetik espero ditugun txitei ongietorria prestatzen.

Arbelera bidean.

Ikusi eta ikasi ditugun gauzak asko izan dira.  Mairuk saia edo putrearen burezurra ekarri zuen. Arrautza berde batzuk ere ekarri zituen Maialenek, kolesterolik ez zeukatela esan zigun. Eta Maria Deliak azaldu zigun zer zen kolesterola. Eta orain koltsulta ere daukagunez eskolan, analisiak egiten aritu gara.

Ba al dago txitorik?

Eta noski, txiten etorrerarekin ere urduri gaude. Etxea egin diegu jada, kartoizko kutxa handiekin egin dugu etxea. Lanpara bat ere ipini dugu, txitoak bero-bero egon daitezen. Arbelera joan ginen asteazkenean, Irati eta Jonek harrera goxoa egin ziguten. Txitentzako pentsua eskatu genien eta eman ziguten. Hala ere, bertan kalabazin haziak erosteko ere probestu genuen. Eta gainera, Arbelekoek hasi pilo bat gehiago oparitu zizkiguten; tomatearenak, letxugarenak, loreenak...

Martxoaren 20an jaioko direla uste dugu. Eukenen bisita ere izan dugu berriro aste honetan. Lehen Pedrorekin egin genuen bezala, Eukenekin ere liternaren bidez txitak ikusten saiatu ginen, eta oraingo honetan ikusi dugu zerbait. Beraz, zain zain gelditzen gara, ea jai egun hauen ostean eskolara itzuli eta txitek ongietorri ematen diguten.

Bien bitartean hemen argazki batzuk.

ARRAUTZATIK OILORA II

Zientziaren munduan, jakin badakigu, esperimentatu egin behar dela gauzak ikasi ahal izateko. Eta hortan jardun gara gu ere esperimentatzen, baina lehengo frogak ez digu emaitza onik ekarri. Eta noski, pilo bat ikasi dugu guzti honetatik.

Otsailaren 26an ziren jaiotzekoak gure txitatxoak, baina ez ziren jaio. Izan ere, aitita Pedrok eta beste zenbait pertsonak esan ziguten bezala, arrautzei oiloak lokatzen denean egunero buelta ematen diela. Guk uste genuen gure inkubadorak ematen ziela buelta eta pozik geunden hori sinestuta.

Euken etorri zen ordea eskolara eta gure usteak erdi ustel! Eukenek ongi esan zigun, inkubadorak emango ziela buelta arrautzei. Kontua da, guk bi akats egin genituela. Alde batetik, inkubadora montatzerakoan tapa alderantziz jarri genuen. Eta bestetik, arrautzak inkubadoran sartzerakoan ez genien posizio egokia eman. Gauzak horrela, gure esperimentua ez zen ongi atera, eta beraz, otsailaren 26an ez genuen txitorik izan zientzia gunean.

Zientzilariek ordea, badakite pazientzia izaten, badakite lehengoan zerbait ez bada irteten berriro ere saiatu beharra dagoela. Saiatu eta saiatu egin beharra dagoela. Eta guk ere horretan dihardugu. Beraz, Eukeni berriro laguntza eskatu diogu, egutegi berri bat egin dugu, arrautza berriak ekarri ditugu eta oraingoan ongi ipini ditugu inkubadoran. Gainera, markatxo bat ere egin dugu, inkubadorak buelta ematen diela egiaztatzeko. Eta hasi gara berriro ere bi egunetik behin ura botatzen behar den zulotxotik. Ea oraingo honetan arrautzetatik oiloak irteten diren. Bitartean, hona hemen beste irudi batzuk:

Argazkiak inkubadora prestatzen

ORIGAMI

Atzo ikasi genuen hitz hau, Origami. Ur eta Xuneren ama, Libe, etorri zen papiroflexiaren artea erakustera eskolara, papiroflexia edo origamia.

Papera doblatuz irudi harrigarriak sor daitezkeela erakutsi zigun. Berak orain dela gutxi hasi omen du mundu honetako bidean, baina oso aberasgarria egin omen zaio.
Izan ere, origamiaren artea Japonetik dator eta denbora-pasa soila baino gehiago da. Matematikak ikasteko ere balio duela aipatu zigun atzo Libek, baina jakin dugu, baita ere, errehabilitazio mediku eta psikologikorako ere lanabes gisa erabili izan dela.

Libek liburutxo bat dauka arte honen ingurukoa eta paper polit pilo bat. Liburu horretako irudiak irakurriz, papera nola tolestu asmatu eta animaliatxo politak egiteko gaitasuna erakutsi zigun. Benetan harrigarria, minutu pare batean ahatxetxo polit bat geneukan esku artean!



Haurrak txunditurik egon ziren begira, nola orri karratu batetik ahateak, baleak, igelak, indioilarrak... atera daitezkeen.

Mila esker zure esku trebezia erakusteagatik, saiatuko gara gu ere origamiaren munduan sartzen!

URAREKIN ESPERIMENTATZEN

Espazioen antolaketa berriarekin hasi ginenetik, gune bakoitzean aldaketak egiten ditugu denboratxo bat pasatzen denean. Abenduko hiru asteetan zientziari dagokionez, haurrei oso erakargarri egin zaien gunea izan dute eskura. 

Haur batzuei noski beste batzuei baino gehiago gustatzen zaie, igarri da hori beraien etorrera kopuruan. Agian kimikariak irtengo dira hemendik edota iturginak, ez dakigu ziur; argi daukaguna da urarekin jolasten/esperimentatzen, oso gustura aritu direla.

 Eta zer ikasi dute gune horreetan? 
Trasbaseak egin dituzte, uretan material batzuek flotatu egiten dutela eta beste batzuek ez ikusi dute, koloranteen bidez kolore nahasteekin kolore berriak sortu dituzte, xiringak erabiltzen ikasi dute, saioadietako ura neurtu dute, tanta-kontagailua erabiltzen ikasi dute, trapuarekin mahaia lehortzen, fregona pasatzen, arau berriak errespetatzen...

Eta dioten bezela irudi batek mila hitzek baino gehiago balio duenez, guzti hori egiaztatzeko argazki eta bideoak atera ditugu. Klikatu eta disfrutatu!!

ARGAZKIAK

ESPAZIOAREN ERALDAKETA

Aramaioko haur hezkuntzakoak egitasmo berri batean parte hartzen ari gara. Berritzegunekoen laguntzaz metodologia aldatzeko urratsak ematen dihardugu. Horretarako espazio berriak sortu ditugu eta geletako ateak kendu. Horrela, haurra izango da nora joan nahi duen erabakitzen duena. Espazioa aldatzeko Berritzeguneko adituen laguntza izan genuen. Eta gainera, egun hartan ateratako argazkiekin, bideo polit bat prestatu digute. 

ZALGOKO PATATA

Aurreko ikasturtean, Zalgoko lurretan patata erein zuten eskolako txikienek. Eta ereindako uzta jasotzera irteera egin genuen irailean. Pedro eta Keparen laguntzaz Zalgoko patata eskolara ekartzeko aukera izan genuen.

Irteera polita izan zen, bazkalostean eskolatik irten eta oinez igo ginen patata ateratzera. Bidean Aramaioko paisaiaz disfrutatu genuen, baserrietako txakurrekin beldurtu ziren batzuek eta jolastu besteak, aldapan gora kostata igo ziren batzuek eta korrika besteak. Egia esan eguzkiak jotzen zuen eta gustura hartu genuen Mirentxuk eskainitako sagar zukua eta ura.

Hasieran, arearekin jolasten entretenitu ginen, baina Keparen atzetik patata landatutako eremura joan ginen berak esan orduko. Bertan, Kepak, uzta jasotzeko arauak gogorarazi zizkigun; eta lanari ekin genion. Eskuak zikintzea zen kontua eta ahal zen patata gehien ateratzea. Batzuek aspertu ziren eta ospa egin zuten berriro arearekin jolastera, beste batzuek ordea burubelarri jarraitu zuten lanean. Azkenean uzta oparoa jaso arte.

Zalgon jasotako uztarekin lan ezberdinak egin ahal izan ditugu. Eskolako txikienak artista hutsak dira sukaldean eta errezeta ezberdinak egin ditugu. Patata era ezberdinetan probatzeko aukera izan dugu, labean erreta, frijituta, patata tortila...

Guzti hau laburbiltzeko, bideo txiki bat prestatu dugu. Espero dugu zuen gustokoa izatea!